२०८३ असार १५ गते
निर्जीवन बीमा कम्पनीहरूको व्यवसायमा बृद्धि,शिखर इन्स्योरेन्स सबैभन्दा अघि
२०८२ चैत ११ गते
काठमाडौं । चालु आर्थिक वर्ष २०८२/०८३ को फागुन मसान्तसम्म आइपुग्दा नेपालका निर्जीवन बीमा कम्पनीहरूको व्यवसाय उल्लेखनीय रूपमा विस्तार भएको देखिएको छ। देशभर सञ्चालनमा रहेका १४ निर्जीवन बीमा कम्पनीहरूले यस अवधिमा कुल ३१ अर्ब ७० करोड रुपैयाँभन्दा बढी बीमा शुल्क संकलन गरेका छन्।
Advertisement:
यो परिमाण अघिल्लो आर्थिक वर्षको सोही अवधिको तुलनामा १३ प्रतिशतभन्दा बढी वृद्धि हो। गत वर्ष फागुन मसान्तसम्म निर्जीवन बीमा कम्पनीहरूले करिब २८ अर्ब रुपैयाँ बराबरको व्यवसाय गरेका थिए, जसको तुलनामा यस वर्ष बजार विस्तार भएको स्पष्ट देखिन्छ।
कम्पनीगत प्रदर्शनतर्फ हेर्दा, शिखर इन्स्योरेन्सले सबैभन्दा बढी बीमा शुल्क आर्जन गर्दै अग्रस्थान कायम राखेको छ। कम्पनीले करिब ४ अर्ब ३८ करोड रुपैयाँ बराबरको व्यवसाय गर्दै अघिल्लो वर्षको तुलनामा करिब ९ प्रतिशत वृद्धि हासिल गरेको छ।
त्यसैगरी, सगरमाथा लुम्बिनी इन्स्योरेन्स र हिमालयन एभरेष्ट इन्स्योरेन्सले पनि उल्लेखनीय कारोबार गरेका छन्। विशेषगरी हिमालयन एभरेष्ट इन्स्योरेन्सले करिब ४५ प्रतिशतको उच्च वृद्धि दर हासिल गर्दै बजारमा आक्रामक विस्तार देखाएको छ। एनएलजी इन्स्योरेन्सले पनि ३६ प्रतिशतभन्दा बढी वृद्धि गर्दै तीव्र गतिमा अघि बढेको छ।
अन्य कम्पनीहरू जस्तै सिद्धार्थ प्रिमियर, आईजिआई प्रुडेन्सियल, नेको, युनाइटेड अजोड, सानिमा जिआईसी, नेपाल इन्स्योरेन्स, प्रभु इन्स्योरेन्स लगायतले पनि मध्यमदेखि राम्रो वृद्धि कायम गरेका छन्।द ओरियन्टल र नेशनल इन्स्योरेन्सले पनि दोहोरो अंकको वृद्धि हासिल गरेका छन् भने अधिकांश कम्पनीहरूले आफ्नो व्यवसाय विस्तार गर्न सफल भएका छन्।
तर, सरकारी स्वामित्वमा रहेको राष्ट्रिय बीमा कम्पनीको कारोबार भने घटेको देखिएको छ। कम्पनीको व्यवसाय करिब २.७९ प्रतिशतले घट्दै एक अर्ब रुपैयाँ आसपासमा सीमित भएको छ।समग्रमा, निर्जीवन बीमा क्षेत्रमा स्थिर वृद्धि र प्रतिस्पर्धा दुवै बढ्दै गएको संकेत देखिएको छ, जसले बीमा बजारको विस्तार र पहुँच वृद्धि भएको पुष्टि गर्छ।
प्रतिक्रिया