२०८३ असार ०६ गते
तिहारका लागि चाँदीको सिक्का आइतबारबाट बिक्री खुला, सुनको असर्फी भने एकदिनमात्रै बेच्दै राष्ट्र बैंक
२०८१ कात्तिक ०८ गते
काठमाडौ । नेपाल राष्ट्र बैंकले आगामी आइतबारदेखि चाँदीका सिक्का बिक्री गर्ने भएको छ । हरेक वर्ष तिहारलाई लक्षित गर्दै बैंकले सुनको असर्फी तथा चाँदीको सिक्का बिक्रि गर्दै आएको छ । तिहार लक्षित चाँदीको असर्फी कात्तिक ११ गतेदेखि कात्तिक १४ गतेसम्म विक्रि गर्ने केन्द्रिय बैंकले जनाएको छ । सुनको असर्फी भने यसपटक कात्तिक १३ गते १ दिन मात्रै बिक्री गरिने राष्ट्र बैंकको भनाइ छ । राष्ट्र बैंक टक्सार महाशाखाले बिहीबार सूचना प्रकाशित गर्दै यसपटक सुनको असर्फी अभाव रहेकाले १३ गते मंगलबार एकदिन बिहान ११ बजेदेखि दिउँसो ४ बजेसम्म मात्रै बिक्री खुला गर्न लागेको जनाएको छ । प्रतिव्यक्ति २.५ ग्रामको एक थानका दरले पहिला आउनेलाई पहिलो प्राथमिकता दिने केन्द्रिय बैंकले भनेको छ ।
चाँदीको मेडालियन गाई अंकित २५ ग्राम, गाई अंकित १० ग्राम, लक्ष्मी अंकित १० ग्राम, गणेश अंकित १० ग्राम र गजलक्ष्मी अंकित १० ग्राम मध्येबाट बिक्री हुने राष्ट्र बैंकले जनाएको छ । चाँदीको सिक्का एक व्यक्तिले ५ थानसम्म किन्न पाउनेछन् । असर्फी, चाँदीका स्मारिका र मेडालियन खरिदका लागि अनिवार्य सक्कल नागरिकता वा परिचय खुल्ने प्रमाण र त्यसको प्रतिलिपि सहित उपस्थित हुनुपर्ने छ । असर्फी तथा मेडालियन खरिद गर्न नगद तथा क्यूआर मार्फत समेत भुक्तानी गर्न सकिने छ । तिहारमा धनतेरसको दिन सुन, चाँदीजस्ता बहुमूल्य धातुको असर्फी तथा सिक्का किन्ने चलन छ ।
Advertisement:
प्रतिक्रिया