बैंकहरुले ऋण उठाउन नसकेपछि साढे सात प्रतिशतसम्म पुग्यो खराब कर्जा, बैकर्स भन्छनः जति बढ्नु बढ्यो अब बढ्दैन्

काठमाडौ । बाणिज्य बैंकलाई खराब कर्जाले तनाव दिएको छ । बिशेष गरी निर्माण व्यवसायीको रकम सरकारले समयमै भुक्तानी नगर्दा उनीहरुले पनि बैंकलाई ऋण तिर्न सकेका छैनन् । जसको कारण बैंकको खराब कर्जा बढ्न पुगेको छ । नेपाल राष्ट्र बैंकले ऋणको पुर्नसंरचना र पुर्नतालिकीकरण गर्न पटक पटक समय थप गरेकै कारण खराब कर्जा उकालो लागेको बैंकर्सहरु बताउँछन् ।

सञ्चालनमा रहेका २० वटै बाणिज्य बैंकहरुले प्रकाशित गरेको चालु आर्थिक बर्षको २०८१÷०८२ को तेस्रो त्रैमाससम्मको (साउन देखि चैतसम्म) वित्तिय विवरण अनुसार अधिकांश बाणिज्य बैंकहरुको खराब कर्जा ह्वात्तै बढेको छ । बैंकहरुलाई अहिले खराब कर्जाको तनाब थपिएको छ । सबैभन्दा बढी खराब कर्जाको मारमा हिमालयन बैंक परेको छ । यो बैंकको खराब कर्जा साढे सात प्रतिशत माथि पुगेको छ ।

Advertisement:

यता प्रभु बैंक, नेपाल इन्भेष्टमेन्ट मेगा बैंक, लक्ष्मी सनराइज, कुमारी बैंक, सिटिजन्स बैंक, प्राइम कमर्सियल बैंक र नेपाल बैंकको खराब कर्जा पनि ५ प्रतिशत माथि पुगेको छ । समान्यतया पाँच प्रतिशत भन्दा माथि खराब कर्जा हुनुलाई राम्रो मानिदैन । यद्यपि खराब कर्जाको कुनै थ्रेसहोल्ड भने निर्धारण छैन । तर पछिल्लो केही महिना अघि नेपाल राष्ट्र बैंकले आफ्नो आन्तरिक लगानीको प्रयोजनार्थ ८ प्रतिशत भन्दा बढी खराब कर्जा ननाघेको बैंकहरु भनेर शर्त राखेपछि कतिपय बैंकहरुको खराब कर्जा बढ्दै छ भन्ने संकेत चाहि देखिएको थियो । किनभने त्यसअघि केन्द्रिय बैंकले पाँच प्रतिशत भन्दा बढी नभएको भनेर शर्त राख्ने गरेको थियो । सबैभन्दा कम खराब कर्जा एभरेष्ट बैंकको देखिएको छ । यस बैंकले अझै खराब कर्जा घटाएको छ । ०.०६ प्रतिशतले यसको खराब कर्जा घटेर ०.६४ प्रतिशत कायम भएको छ ।

बैकर्स भन्छनः जति बढ्नु बढ्यो अब बढ्दैन्

बैंकर्सहरुले भने आगामी त्रैमासमा बैंकहरुको खराब कर्जा यो भन्दा नबढ्ने बताएका छन् । एभरेष्ट बैंकका प्रमुख कार्यकारी अधिकृत (सिईओ) सुदेश खालिङले निर्माण क्षेत्र र साना तथा मझौला उद्यममा समस्या हुँदा बैंकको खराब कर्जा ह्वात्तै बढेको बताउँछन् । उनी भन्छन, ‘निर्माण क्षेत्रले र साना तथा मझौला उद्यमले ऋण तिर्न नसकेको देखिन्छ त्यसैको रिफ्लेक्सन हो खराब कर्जाको बृद्धि ।’खराब कर्जा लगभग बढीसकेकोले आगामी त्रैमासमा यो भन्दा बढी नहुने आँकलन समेत खालिङको छ ।

यता,सबैभन्दा बढी खराब कर्जा देखिएको हिमालयन बैंकका सिइओ अशोक शम्शेर राणा भने खराब कर्जा अधिक बढी हुनुमा तत्कालिन सिभिल बैंकको ऋण एडजस्टमेन्टमा समस्या रहेको बताए । उनले भने, ‘हामीले सिभिललाई एक्वायर गर्दा उसको पोर्टफोलियो म्यानेजमेन्टमा समस्या भएको छ । जति बढ्नु तेस्रो त्रैमासमा बढ्यो अब यो भन्दा बढी हुदैन ।’ अर्कोतर्फ समग्र बैकिङ उद्योग नै खराब कर्जाको चपेटामा पर्नुमा अर्थतन्त्र अझै पनि चलायमान छैन भन्ने संकेत भएको उनले बताए ।

बैकिङ विज्ञ भुवन दाहाल बैंकहरुले कर्जाको पुर्नतालिकीकरण र पुर्नसंरचना गरेकै ऋण अहिले आएर खराब कर्जामा दर्ज भएकोले बढेको देखिएको बताउँछन् । होेइन भन नयाँ खराब कर्जा बढेको छैन । पछिल्लो समय बैंकहरुको विभिन्न आम्दानी बढ्नुले पनि अर्थतन्त्र विस्तारै चलायमान भइरहेको संकेत दिएको छ, दाहाल भन्छन । खराब कर्जा बढ्नुको कारण धेरै भए पनि मुख्य रूपमा अर्थतन्त्रमा देखिएको शिथिलता नै प्रमुख भएको बैंकर्सको भनाई छ । बैंकले निश्चित समयका लागि भनेर कुनै ऋणीलाई दिइएको कर्जा समयमा नै उठाउन सकेन भने त्यस्तो कर्जा खराब कर्जा (एनपिएल) मा दर्ज हुन्छ । खराब कर्जा बढ्दै गए बैंकको विश्वसनियतामा आँच आउन सक्छ ।