२०८३ असार १५ गते
चालु आर्थिक वर्ष २.७ प्रतिशत आर्थिक बृद्धि हुने एडिबिको प्रक्षेपण
२०८२ चैत २७ गते
काठमाडौं । एसियाली विकास बैंक (एडीबी) ले चालु आर्थिक वर्ष नेपालको आर्थिक वृद्धिदर २.७ प्रतिशतमा सीमित हुने प्रक्षेपण सार्वजनिक गरेको छ ।
एसियन डेभलपमेन्ट आउटलुक २०२६’ अनुसार सन् २०२६ मा नेपालको आर्थिक वृद्धिदर २.७ प्रतिशतमा खुम्चिने देखिएको छ । जुन गत वर्ष २०२५ को तुलनामा ४.६ प्रतिशतभन्दा न्यून हो ।
Advertisement:
यद्यपि सन् २०२७ मा ५ प्रतिशतको बलियो पुनरागमन हुने आशा पनि आउटलुकले गरेको छ । नेपालको आर्थिक वृद्धिदर आगामी दुई वर्ष उतारचढावपूर्ण रहने अनुमान एडीबीको छ ।
छिमेकी मुलुकहरू भुटान र भारत ६।९ प्रतिशतको उच्च वृद्धिदरका साथ अगाडि बढिरहँदा नेपालको आर्थिक वृद्धिदर २.७ प्रतिशतमा सीमित हुने देखिएको हो ।
यस्तै मुद्रास्फीति २०२६ मा ३.७ प्रतिशत रहने र २०२७ मा अझ बढेर ४.५ प्रतिशत पुग्ने प्रक्षेपण गरिएको छ । यसको मुख्य कारण घरेलु आर्थिक गतिविधिहरू बढ्दै जाने अपेक्षा हो ।
मध्य पूर्वको द्वन्द्वले नेपालको चालु खाता विस्तारमा असर पार्ने अनुमान छ । २०२५ मा जिडिपिको ६.७ प्रतिशत रहेको चालु खाता अधिशेष २०२६ मा बढेर ७.२ प्रतिशत पुग्ने प्रक्षेपण गरिएको छ, जसलाई वैदेशिक रोजगारीबाट आउने रेमिटेन्स र निर्यातको मध्यम वृद्धिले समर्थन गर्नेछ।
तर, वैदेशिक रोजगारीमा अस्थायी कमी, उच्च तेल मूल्यका कारण बढ्दो आयात खर्च, र पर्यटन सिजनमा सम्भावित आम्दानी घट्ने अवस्थाले यसलाई आंशिक रूपमा सन्तुलन गर्नेछ। त्यसपछि २०२७ मा चालु खाता अधिशेष घटेर ५.३ मा झर्ने अपेक्षा गरिएको छ।
प्रतिक्रिया