.jpg)
२०८३ असार १९ गते
एआईमा आधारित वैज्ञानिक खोजलाई अघि बढाउन ट्रम्पद्वारा ‘जेनेसिस मिसन’ शुभारम्भ
२०८२ मंसिर १० गते
काठमाडौं । अमेरिकी राष्ट्रपति डोनाल्ड ट्रम्पले जेनेसिस मिसन नामक ठूलो राष्ट्रिय पहल सुरु गरेका छन् । जसको उद्देश्य एआई–समर्थित वैज्ञानिक अनुसन्धानलाई तीव्र बनाउनु र विश्वमै अमेरिकाको प्रविधि नेतृत्वलाई थप मजबुत पार्नु हो ।
ह्वाइट हाउसद्वारा जारी विज्ञप्ति अनुसार, यो मिसनले संघीय निकायहरूमा रहेको दशकौँ लगानीबाट संकलित विश्वकै सबैभन्दा ठूलो वैज्ञानिक डाटासेट प्रयोग गरी एकीकृत एआई प्लेटफर्म निर्माण गर्नेछ ।
Advertisement:
विज्ञप्तिमा भनिएको छ,“जेनेसिस मिसनले संघीय वैज्ञानिक डाटासेटहरूको उपयोग गरी ठूला वैज्ञानिक फाउन्डेशन मोडेल प्रशिक्षण गर्ने, एआई एजेन्ट विकास गर्ने, नयाँ वैज्ञानिक परिकल्पना परीक्षण गर्ने, अनुसन्धान प्रक्रिया स्वचालित बनाउने र वैज्ञानिक उपलब्धिहरूलाई तीव्र पार्नेछ ।”
यो पहलअन्तर्गत देशभरका राष्ट्रिय प्रयोगशालाहरू, विश्वविद्यालयहरू, निजी कम्पनीहरू, अनुसन्धान पूर्वाधार, डेटा भण्डारण केन्द्र, उत्पादन उद्योग र राष्ट्रिय सुरक्षा संस्थानहरूलाई एकै स्थानमा जोडिनेछ । मिसनले वैज्ञानिक खोज, राष्ट्रिय सुरक्षा, ऊर्जा क्षमता, कार्यबल उत्पादकता तथा करदाताको लगानीको प्रतिफललाई उल्लेखनीय रूपमा बढाउने लक्ष्य लिएको छ ।
जेनेसिस मिसनको केन्द्रमा अमेरिकी साइन्स एण्ड सेक्युरिटि प्लेटफर्म रहनेछ, जसले उच्च क्षमता कम्प्युटिङ संसाधन, एआई मोडेलिङ उपकरण, विषयविशेष फाउन्डेशन मोडेल, सुरक्षित संघीय डाटासेट पहुँच तथा एआई–सक्षम अनुसन्धान उपकरण उपलब्ध गराउनेछ । यसका लागि अमेरिकी ऊर्जा मन्त्रालयका सुपरकम्प्युटर, सुरक्षित क्लाउड प्रणाली तथा उन्नत एआई प्रविधि प्रयोग गरिनेछ ।
यस मिसनले सरकारी निकायबीच समन्वय, विश्वविद्यालय र उद्योगसँग सहकार्य, प्रतिस्पर्धात्मक अनुसन्धान कार्यक्रम तथा एआई, डेटा वा कम्प्युटिङ क्षमतामा दक्ष बाह्य साझेदारहरूसँग सुरक्षित साझेदारी सुनिश्चित गर्नेछ ।
एएनआई
प्रतिक्रिया