.jpg)
२०८३ कात्तिक १५ गते
विकास बैंकहरुको नाफा दोब्बरभन्दा बढी, पहिलो त्रैमासमा कमाए १ अर्ब ६७ करोड
२०८३ कात्तिक १५ गते
काठमाडौं । चालु आर्थिक वर्ष २०८३/८४ को पहिलो त्रैमासमा सञ्चालनमा रहेका ८ राष्ट्रियस्तरका विकास बैंकले कुल १ अर्ब ६७ करोड ५ लाख ८१ हजार रुपैयाँ खुद नाफा आर्जन गरेका छन् । यो गत आर्थिक वर्षको सोही अवधिको तुलनामा ११३.२३ प्रतिशत बढी हो ।
गत आर्थिक वर्षको पहिलो त्रैमासमा यी बैंकले ७८ करोड ३४ लाख ५४ हजार रुपैयाँ खुद नाफा कमाएका थिए । यस वर्ष बैंकहरूको नाफामा उल्लेख्य वृद्धि देखिएको छ । बैंकहरूको कर्जा नोक्सानी व्यवस्थापनका लागि छुट्याउनुपर्ने प्रोभिजन रकम घट्नुले नाफा बढाउन सहयोग गरेको हो ।
Advertisement:
असोज मसान्तसम्मको वित्तीय विवरणअनुसार सबैभन्दा बढी खुद नाफा कमाउने बैंकमा लुम्बिनी विकास बैंक रहेको छ । बैंकले समीक्षा अवधिमा ३२ करोड ७१ लाख ५४ हजार रुपैयाँ खुद नाफा कमाएको छ । गत वर्षको सोही अवधिमा भने बैंकले ३४ करोड ८५ लाख ७७ हजार रुपैयाँ खुद नोक्सानी बेहोरेको थियो ।
त्यस्तै, दोस्रो स्थानमा रहेको मुक्तिनाथ विकास बैंकले ३२ करोड २४ लाख २४ हजार रुपैयाँ खुद नाफा कमाएको छ । गत वर्षको तुलनामा बैंकको नाफा ४३.४४ प्रतिशतले बढेको हो ।
गरिमा विकास बैंकले २४ करोड १ लाख २४ हजार रुपैयाँ खुद नाफा आर्जन गर्दा कामना सेवा विकास बैंकले २३ करोड ११ लाख ५५ हजार रुपैयाँ कमाएको छ । यस्तै, ज्योति विकास बैंकको खुद नाफा २० करोड १ लाख ६१ हजार रुपैयाँ पुगेको छ ।
अन्य बैंकको खुद नाफा भने २० करोड रुपैयाँभन्दा कम छ । समीक्षा अवधिमा ८ बैंकमध्ये ५ वटाको खुद नाफा बढेको छ भने ३ वटाको घटेको छ ।
समग्रमा हेर्दा विकास बैंकहरूको खुद नाफामा उल्लेख्य सुधार देखिए पनि सबै बैंकको नाफा वृद्धिदर समान छैन । लुम्बिनी विकास बैंक गत वर्षको घाटाबाट नाफामा फर्किएको छ भने मुक्तिनाथ विकास बैंकले पनि नाफा वृद्धिलाई निरन्तरता दिएको छ ।
प्रतिक्रिया