२०८३ असार १७ गते
बैंकिङ्ग क्षेत्रको उछालसँगै नेप्सेमा ठूलो वृद्धि
२०८२ चैत ०५ गते
काठमाडौँ । साताको अन्तिम कारोबार दिन बिहीबार नेप्से परिसूचक उल्लेख्य अंकले बढ्दै उच्च विन्दुमा बन्द भएको छ। बैंकिङ्ग उपसमूहमा आएको उच्च वृद्धिले समग्र बजारलाई माथि तानेको देखिएको छ।
यस दिन नेप्से परिसूचक ६४.६९ अंकले उकालो लाग्दै २८७७.०३ विन्दुमा पुगेको छ। सेन्सेटिभ सूचक ११.६३ अंकले बढ्दा फ्लोट सूचक ४.८५ अंक र सेन्सेटिभ फ्लोट सूचक ४.१४ अंकले वृद्धि भएका छन्। बैंकिङ्ग उपसमूहमा करिब ३ प्रतिशतभन्दा बढीको उछाल देखिँदा विकास बैंक समूह सबैभन्दा अगाडि रहँदै करिब ४ प्रतिशतले बढेको छ।
Advertisement:
कारोबार रकम पनि उल्लेख्य रूपमा बढेको छ। अघिल्लो दिनको तुलनामा लगानीकर्ताको सक्रियता बढ्दै ३४२ वटा धितोपत्रको १ लाख ९१ हजारभन्दा बढी कारोबारबाट २१ अर्ब २२ करोड रुपैयाँभन्दा बढीको शेयर किनबेच भएको छ। कुल ५ करोड ६९ लाखभन्दा बढी कित्ता शेयर कारोबार भएको देखिन्छ।
यस दिन सबै १३ उपसमूह हरियालीमा बन्द भएका छन्। जलविद्युत र जीवन बीमा समूहमा २ प्रतिशतभन्दा बढीको वृद्धि हुँदा वित्त, होटल तथा पर्यटन, लगानी, उत्पादन तथा प्रशोधन, लघुवित्त, निर्जीवन बीमा लगायतका उपसमूहमा पनि १ प्रतिशतभन्दा माथिको सुधार देखिएको छ।
बजारमा केही कम्पनीहरूको शेयरमा सकारात्मक सर्किट लागेको छ। कर्पोरेट डेभलपमेन्ट बैंक, सालपा विकास बैंक, रिलायन्स स्पिनिङ्ग मिल्स र सोलु हाइड्रोपावरका शेयर उच्चतम सीमासम्म बढेका छन्। त्यस्तै, होटल फरेष्ट इनको शेयर करिब १० प्रतिशत र सान्जेन जलविद्युत कम्पनीको ८ प्रतिशतले वृद्धि भएको छ।
त्यसैगरी, कोर्बल, रस्मि लघुवित्त र सानिमा बालुवा कम्पनी जस्ता कम्पनीहरू पनि करिब १० प्रतिशतसम्म उकालो लाग्दै शीर्ष कमाउने सूचीमा परेका छन्। साहस ऊर्जा, हिमालयन फाइनान्स, सुपर मादी हाइड्रोपावर, निका, सिबिल बैंक र मेगा बैंकमा पनि उल्लेख्य वृद्धि देखिएको छ।
यता, केही धितोपत्रमा भने सामान्य गिरावट पनि देखिएको छ। नेपाल लाइफ समृद्धि लगानी योजनाको इकाईमूल्य सबैभन्दा धेरै घटेको छ भने अन्य केही कम्पनीमा सीमित दबाब देखिएको छ।
कारोबार रकमका आधारमा ङादी ग्रुप पावर शीर्ष स्थानमा रहँदा नेशनल हाइड्रोपावर र रिडी हाइड्रोपावरमा पनि उच्च कारोबार भएको छ। समग्रमा बजारमा सकारात्मक मनोविज्ञान बलियो बनेको छ। बैंकिङ्ग र विकास बैंक समूहको नेतृत्वमा आएको व्यापक सुधारले बजारलाई मजबुत उकालो यात्रामा अघि बढाएको विश्लेषण गरिएको छ।
प्रतिक्रिया