२०८३ असार १५ गते
बजेट निर्माणमा जुटेको अर्थमन्त्रालय प्रवेशमा कडाई, योजना पार्न मन्त्री भेट्न जानेलाई प्रहरीले पनि सकेनन् रोक्न
२०८२ वैशाख २४ गते
काठमाडौँ । आगामी आर्थिक वर्षका लागि वार्षिक बजेट निर्माणको चटारोमा जुटेको अर्थमन्त्रालयमा मन्त्रालय बाहिरका व्यक्ति प्रवेशमा कडाई गरिएको छ । अर्थमन्त्रालयमा सुरक्षार्थ खटिएका एक प्रहरीका अनुसार यस्तो कडाई गरिएको करिब १५ दिन भयो । यतिखेर मन्त्रालयको दक्षिणतर्फको ढोका पूर्ण रुपमा बन्द गरिएको छ भने उत्तर तर्फको मुल प्रवेश द्वारमा प्रहरीको कडा चेकिङ पश्चात मात्र बाहिरी व्यक्तिलाई प्रवेश दिइएको छ । बजेट बनाउन मूख्य भूमिका खेल्ने बजेट महाशाखाको ढोका बन्द गरिएको छ ।
अर्थमन्त्रालयमा यतिखेर अर्थमन्त्री विष्णुप्रसाद पौडेल अर्थसचिव,सहसचिव लगायतको टोली बिहान ७ बजेदेखि बेलुकी ८ बजेसम्म आगामी आवको बजेट निर्माणमा खटिएको अर्थमन्त्रालय स्रोत बताउँछ ।
Advertisement:
मन्त्रालय प्रवेशमा गरिएको कडाईको बावजुद स्वार्थ समूहहरु अर्थ मन्त्रालयका कोठा चोटामा यतिखेर हुलका हुल बाँधेर पुगिरहेका छन् । अर्थमन्त्रीसँग भेट गरी आआफ्ना योजना तथा नीतिका लागि दवाब दिन व्यापारी, जनप्रतिनिधीदेखि नागरिक समाजका अगुवाहरु तँछाडमछाड गर्दै मन्त्रालय धाइरहेका छन् । यसरी मन्त्रालय पुग्नेहरु गेटमा सोधपुछका लागि बसेका प्रहरीले नाम टिपाउन खोज्दा झर्किफर्की गर्दै नाम न टिपाई हिँड्न खोज्ने सुरक्षामा तैनाथ प्रहरीहरु बताउँछन् । 'मन्त्रीज्यूले टाइम दिनुभएको छ हतार भैसक्यो भन्दै खुरुखुरु भित्र पस्न खोज्छन् हाम्रो जागिरको सवाल छ, तलमाथि भए जागिर जान्छ ।' एक प्रहरी गुनासो गर्दै थिए ।
त्यसो त अर्थमन्त्री विष्णु पौडेलको नीति पनि सबैलाई रिझाउनेतर्फ उन्मुख भएको बुझिन्छ । दिनमै विभिन्न पेशागत व्यपारीहरु,संघ संस्थाका डेलिगेट्सहरुलाई भेट दिइरहेका छन् । उनी आफू पनि प्रमुख प्रतिपक्षी दलका अध्यक्ष पुष्पकमल दाहाल प्रचण्डदेखि सत्ता साझेदार दलक सभापति शेरबहादुर देउवासँग भेट गर्दै बजेटका सम्वन्धमा छलफल गरिरहेका छन् ।
सरकारले गत साता संसदमा नीति तथा कार्यक्रम प्रस्तुत गरिसकेको छ । नीति तथा कार्यक्रमकै वरिपरी रहेर बजेट बन्ने भनिँदा नयाँ योजना बजेटमा समावेश हुन असम्भव हुने बुझिन्छ । तर यसअघिका पुराना अभ्यास हेर्दा बजेट सार्वजनिक गर्ने अघिल्लो दिनसम्म पनि अर्थमन्त्रीले विभिन्न योजनाका लागि दवाब दिने र माग बोकेर मन्त्रालय पुग्नेहरुलाई भेट दिइरहने गरेका थिए । त्यसै अभ्यासलाई पौडेलले पनि निरन्तरता दिइरहेका छन् ।
प्रतिक्रिया