वैदेशिक रोजगार बोर्डका निर्देशक टीकाराम ढकालको गीत ‘छोरो गयो परदेश’ सार्वजनिक(भिडियो सहित)

काठमाडौँ । गीतकार टिकाराम ढकालको गीत “छोरो गयो परदेश।।” को म्युजिक भिडियो सार्वजनिक भएको छ। डिजराज पौडेलको स्वर तथा संगीत रहेको उक्त गीतको म्युजिक भिडियो काठमाडौंमा आज एक कार्यक्रमका बीच वरिष्ठ हास्य कलाकार एवं उक्त गीतमा प्रमुख भुमिकामा अभिनय गरेका नारद खतिवडाले सार्वजनिक गरेका हुन्।

आर्या ईन्टरटेन्मेन्टको ब्यानरमा निर्माण भएको गीतको भिडियो निर्देशक कपिल कार्कीले निर्माण गरेका हुन् भने भिडियोमा कलाकार नारद खतिवडा, दिपेन्द्र खत्री (आरुष), डिजराज पौडेल, टिकाराम ढकाल, मन्जु श्रेष्ठ, आरोभ ढकाल लगायतको अभिनय देख्न सकिन्छ। नेपाल सरकार, वैदेशिक रोजगार बोर्डको निर्देशक समेत रहेका ढकालको आफ्नै युट्युव च्यानल @DhakalTR बाट रिलिज गरिएको उक्त गीतमा नेपालको वैदेशिक रोजगारीको वर्तमान अवस्था, सो सम्बन्धमा आम मानिसमा सिर्जना भएको धारणा र भाष्य लगायतको यथार्थता देखाउन खोजिएको छ भने गीतको अन्त्यमा वैदेशिक रोजगारप्रति निराशमात्र हुनु नपर्ने र सोबाट नेपालले गर्न सक्ने विकास एवं समृद्धि सम्बन्धी सकारात्मक सन्देश दिन खोजेको छ।

गीत सार्वजनिक कार्यक्रममा बोल्दै गीतकार ढकालले भने – “म आफै वैदेशिक रोजगारमा जाने नेपाली श्रमिकको कल्याणकारी कार्य गर्ने निकायमा कार्यरत रहेकोले वैदेशिक रोजगारीका समस्या, पीडा, वर्तमान अवस्था प्रत्यक्ष रुपमा नजिकबाट अनुभुति गरेको र भावी दिनमा यसको सकारात्मक असर देखिने समेत अनुभुत गरी सो विषयलाई सन्देशमूलक गीतबाट आम श्रोता तथा दर्शकमाझ पस्किने जमर्को गरेको” बताएका छन्। उनले निर्मित भिडियोलाई स्वदेश तथा विदेशमा रहने सम्पूर्ण नेपाली आमाबुवा, दाजुभाई तथा दिदि बहिनीहरुले हेरी श्येर गरिदिन समेत अनुरोध गरेका छन्। यस अघि उनले निर्माण गरेको ख्यालै ख्यालैमा भैयो बन्धकी बोलको गीत गत दशैंमा सार्वजनिक भएको थियो।

कार्यक्रममा बोल्दै वरिष्ठ हाँस्य कलाकार नारद खतिवडाले वैदेशिक रोजगारीको वर्तमान अवस्थाले निराशावादी रहेका आम श्रोतालाई आशावादी बन्नेतर्फ सकारात्मक सन्देश दिएको र उक्त गीतमा ढकालसँग सहकार्य गर्न पाउँदा आफूलाई खुसी लागेको बताएका छन्। गायक डिजराज पौडेलले आफुहरुले उक्त गीत मार्फत मनोरञ्जनात्मक तवरले सन्देश समेत दिन खोजेको र आफूले गाएका गीतहरु मध्ये उत्कृष्ट रहेको बताएका छन्।

कार्यक्रममा म्युजिक भिडियो निर्देशक कपिल कार्की, गीतमा अभिनय गर्ने कलाकार र सञ्चारकर्मीहरुको उपस्थिति रहेको थियो।

भिडियो हेर्नुहोस्-

Chhoro Gayo Paradesh.. छोरो गयो परदेश.. | Narad Khatiwada | Dij Raj | Dipendra | Manju | Aarov |