लगातार तेस्रो दिन शेयर बजारमा दोहोरो अङ्कको गिरावट

काठमाडौँ। बुधबार पनि नेप्से परिसूचक दोहोरो अंकले घटेको छ । आज नेप्से परिसूचक २५.१६ विन्दुले घटेर २८२१.१३ अंकमा पुगेको छ । बजार खुलेदेखिनै विभिन्न उतार चढाव बेहोरेको नेप्से अन्ततः ०.८८ प्रतिशतले घटेको हो ।

यस दिन नेप्सेका १३ वटा उपसमूहमा एक उपसमूह (व्यापार) बाहेक १२ वटै उपसमूहका परिसूचक घटेका छन् । यस दिन एक मात्र बढ्ने उपसमूह व्यापार उपसमूह ०.४३ प्रतिशतले बढेको छ भने सर्वाधिक घट्ने उपसमूहमा फाइनान्स उपसमूह रह्यो जसको परिसूचक १.५७ प्रतिशतले घटेको छ।

नेप्से परिसूचक घटेसँगै आज कारोबार रकम पनि घटेको छ। अघिल्लो कारोबार दिन १२ अर्ब ९४ करोड बराबरको शेयर खरिदबिक्री भएको बजारमा यस दिन एक लाख एक हजार एक सय तीन पटकको कारोबारमा १० अर्ब ९७ करोड बराबरको किनबेच भएको छ । जसमा ६२ कम्पनीका शेयर बढेका छन् भने १७४ कम्पनीका शेयर घटेका छन् । त्यसै गरी आठ कम्पनीका शेयर स्थिर रहेका छन् ।

बुधबार सर्वाधिक बढ्ने स्टकमा गार्डियन माइक्रो लाइफ इन्स्योरेन्स र समाज लघुवित्त रह्यो जसको शेयर दश प्रतिशतले बढेको छ । त्यसै गरी सर्वाधिक घट्ने स्टकमा ग्रिन डेभलप्मेंट बैंक रह्यो जसको शेयर ६.८४ प्रतिशतले घटेको छ ।

कारोबार रकमका आधारमा सर्वाधिक कारोबार हुनेमा हिमालयन रिइन्स्योरेन्स रह्यो जसको ९६ करोड ७० लाख बराबरको शेयर कारोबार भएको छ । त्यस्तै, आज भोल्युमको आधारमा सर्वाधिक कारोबार हुनेमा एनएमबि शुलभ इन्भेस्टमेन्ट फन्ड-२ रह्यो जसको ११ लाख १३ हजार कित्ता शेयर किनबेच भएको छ।