नेपाल ग्रेलिस्टमा परेपछि अर्थमन्त्री पौडेलको प्रतिकृया : निर्धारित समय अगावै ग्रे लिष्टबाट बाहिर निस्कन्छौं

काठमाडौं । उपप्रधानमन्त्री एवं अर्थमन्त्री विष्णुप्रसाद पौडेलले नेपाल निर्धारित समय अगावै ग्रे लिष्टबाट बाहिर निस्कने बताएका छन् । फाइनान्सियल एक्सन टाक्स फोर्स (एफएटिएफ) ले नेपाललाई ग्रे लिष्टमा राखेपछि संक्षिप्त प्रतिकृया दिँदै उपप्रधानमन्त्री एवं अर्थमन्त्री पौडेलले भने,विगतमा निर्धारित समयमा निर्धारित काम सम्पन्न गर्न नसक्दा यो परिस्थिति निर्माण भएको हो ।

पेरिस बैठकबाट नेपालको एक्सन प्लान स्वीकृत भएको छ । एक्सन प्लान अनुसार प्रभावकारी रुपमा काम गरेर हामी निर्धारित समय अगावै ग्रे लिष्टबाट बाहिर निस्कन्छौं । एफएटीएफको प्लेनरी तथा वर्किङ ग्रुपको बैठकले नेपाललाइ खैरोसुचिमा पारेको हो । बैठक फेब्रुअरी १७ मा पेरिसमा सुरू भएको थियो । आज सकिएको प्लेनरीले नेपाललाई खैरोसूचीमा राखेको हो । अवैध धन नियन्त्रणमा अनुसन्धान र अभियोजन कमजोर भएका कारण नेपाल ग्रेलिस्टमा परेको हो ।

एसिया प्यासिफिक ग्रुप अन मनी लाउन्डरिङ’ ले दुई वर्षअघि नेपालमा सम्पत्ति शुद्धीकरण तथा आतंककारी क्रियाकलापमा वित्तीय लगानी निवारण सम्बन्धी ‘पारस्परिक मूल्यांकन प्रतिवेदन’ (म्युचुअल इभालुएसन) एफएटीएफलाई बुझाएको थियो । जसमा एफएटीएफले ४० वटा सुधारका क्षेत्रहरू औंल्याएको थियो ।