‘घिउ अभियान’ को सुरुवात गर्दै डेरी एसोसिएसनद्वारा तीज शुभकामना आदानप्रदान कार्यक्रम सम्पन्न

काठमाडौँ । नेपाली महिलाहरूको महान् पर्व तीजको अवसर पारेर नेपाल डेरी एसोसिएसनले आफ्नो केन्द्रीय कार्यालय संखमुलमा ‘दर खाने तथा शुभकामना आदानप्रदान कार्यक्रम २०८२’ सम्पन्न गरेको छ ।तीजलाई मौलिक संस्कार, सभ्यता र भव्यतापूर्वक मनाउनुपर्नेमा जोड दिँदै यस वर्ष एसोसिएसनले महिलामुखी अभियानलाई अझ प्रभावकारी बनाउन ‘घिउ अभियान’ को सुरुवात गरेको हो । यस अभियानअन्तर्गत तीजमा उपस्थित अतिथि र सम्पूर्ण महिला सदस्यलाई उपहारस्वरूप घिउ वितरण गरिएको थियो ।

Advertisement:

कार्यक्रमको प्रमुख अतिथि बागमती प्रदेश सभाका उपसभामुख अप्सरा चापागाईं थिइन् भने नेपाल डेरी एसोसिएसनका केन्द्रीय उपाध्यक्ष दिप प्रसाद धमलाले कार्यक्रमको अध्यक्षता गरेका थिए । कार्यक्रममा केन्द्रिय अध्यक्ष प्रल्हाद दाहाल, उद्योग वाणिज्य महासंघका केन्द्रीय सदस्य नरेश श्रेष्ठ, नेपाल डेरी एसोसिएसनका पूर्व अध्यक्ष सुमित केडिया, पदाधिकारीहरू, नेपाल कृषि तथा पशुपन्छी व्यवसायी महासंघका महासचिव श्रीकृष्ण भण्डारी, राष्ट्रिय दुग्ध विकास बोर्ड, नेपाल निर्यात महासंघ, रोटरी क्लब कपन, दृश्य बहुउद्देश्यीय सहकारी संस्था, अप्टिमिस्ट क्लब अफ डेरी इन्टरप्रेन्युरलगायतका संघ–संस्थाका पदाधिकारी तथा महिला सदस्यहरूको उल्लेख्य सहभागिता थियो ।यस्तै, निवर्तमान योजना आयोगका सदस्य दिपेन्द्र श्रेष्ठ र अनाजका अध्यक्ष किरण आचार्य पनि कार्यक्रममा उपस्थित रहेका थिए ।

कार्यक्रममा डेरी एसोसिएसनका उपाध्यक्ष मनोज घिमिरेले उपस्थित सबैलाई स्वागत गर्दै कार्यक्रमको उदेश्य बारे प्रष्ट पारेका थिए । कार्यक्रमलाई सम्बोधन गर्दै प्रमुख अतिथि उपसभामुख अप्सरा चापागाईंले तीज केवल महिलामात्रको पर्व नभई समाजमा सद्भाव, आपसी सहयोग र सम्मानको सन्देश दिने पर्व भएकाले यसलाई भड्किलो भन्दा सभ्य र मौलिक शैलीमा मनाउनुपर्ने बताइन् ।

बागमती प्रदेशका निवर्तमान योजना आयोगका सदस्य दिपेन्द्र श्रेष्ठले महिला सशक्तिकरण मात्र नभई दुग्ध व्यवसाय प्रवर्द्धनमार्फत देशको समग्र विकासमा समेत योगदान पुर्‍याइरहेको उल्लेख गरे ।नेपाल डेरी एसोसिएसनले यसअघि ‘मोहि अभियान’ सफलतापूर्वक सञ्चालन गरेको अनुभवलाई निरन्तरता दिँदै यसपटक ‘घिउ अभियान’ सुरू गरेकोमा नेपाल उद्योग वाणिज्य  महासंघका नरेशलाल श्रेष्ठले एसोसिएसनको प्रशंसा गर्दै महासंघ सधैं साथमा रहने कुरा बताए ।

एसोसिएसनका पूर्व अध्यक्ष सुमित केडियाले सबैले यसरी साथ  दिनाले नै एसोसिएसन आज यसरी उत्साहका काम गर्न सकेको कुरा उल्लेख गर्दै आगामी दिनमा पनि यसरी नै एसोसिएसनले आफ्ना गतिविधि गरिरहने कुराको प्रतिबद्धता ब्यक्त गरे । 

एसोसिएसनका केन्द्रिय अध्यक्ष प्रल्हाद दाहालले उपस्थित सबैलाई एसोसिएसनको तर्फबाट तिजको शुभकामना ब्यक्त गर्दै निमन्त्रणा स्विकार्दै उपस्थित भएका सबैलाई धन्यवाद समेत ब्यक्त गरे । मोही अभियानको अपार सफलता पछि अब घ्यू अभियानमा लागेको कुरा जानकारी गराउँदै घ्यू उपभोग गर्दा हुने फाइदाको बारे जानकारी गराए । साथै अब सबैले बिहान बेलुका खाना खाँदा घ्यु खान , तरकारीमा घ्यू कै भुटुन हाल्न अनि बालबालिकालाई अनिवार्य घ्यु सेवन गराउनको लागि आव्हान गरे । 

उपस्थित वक्ताहरूले यस किसिमका अभियानहरूले स्वदेशी उत्पादनलाई प्रोत्साहन गर्ने मात्र नभई महिलामुखी पर्वमा आत्मनिर्भरता र मौलिक परम्पराको संरक्षणमा समेत टेवा पुग्ने विश्वास व्यक्त गरे । अन्त्यमा कार्यक्रमका सभापति दिप प्रसाद घमलाले सबैलाई धन्यवाद ब्यक्त गर्दै दूध तथा दुग्ध पदार्थको बारे जानकारी गराए ।