नेप्से परिसूचक दोहोरो अंकले बढ्यो, कारोबार रकममा पनि वृद्धि

काठमाडौँ । यस हप्ताको दोस्रो कारोबार दिन शेयर बजार दोहोरो अंकले बढेको छ । यस दिन नेप्से परिसूचक  २७.५४ अंकले बढेर २०९२ अंकमा बन्द भएको छ । बजार खुलेदेखिनै विभिन्न उतारचढाव व्यहोरेको नेप्से अन्ततः १.३३ प्रतिशतले बढ्न पुगेको हो ।

आज नेप्सेमा १३ उपसमूहमध्य ८ वटा उपसमूहको परिसूचक बढेका छन् भने अन्य ५ उपसमूहको परिसूचक घटेका छन् । सोमबार सर्वाधिक बढ्नेमा बैंक उपसमूह रह्यो जसको परिसूचक ४.१८ प्रतिशतले वृद्धि भएको छ । यसै गरी सर्वाधिक  घट्ने उपसमूहमा लघुवित्त उपसमूह रह्यो जसको परिसूचक ०.६५ प्रतिशतले घटेको छ ।

सोमबार सर्वाधिक रकमको कारोबार गर्नेमा पोखरा फाइनान्स रह्यो जसको १९ करोड ९२ लाख रुपैयाँ बराबरको शेयर किनबेच भएको छ । संख्याको हिसाबले सर्वाधिक शेयर कारोबार हुनेमा कुमारी बैंक रह्यो जसको ४ लाख ४३ हजार ५८ कित्ता शेयर किनबेच भएको छ ।