हिमालयन रि-इन्स्योरेन्सलाई प्रिमियममा आईपीओ जारी गर्न ढोका खुल्यो

काठमाडौं। हिमालयन रि-इन्स्योरेन्स कम्पनीले प्रिमियममा आईपीओ जारी गर्न पाउने भएकाे छ ।  कम्पनीले प्रिमियम रकममा आईपीओ जारी गर्ने विषय विरुद्ध उच्च अदालत पाटनमा  परेको रिट निवेदनमा अदालतले अन्तरिम आदेश दिन अस्वीकार गरेको छ ।

जसले गर्दा कम्पनीलाई प्रिमियम मूल्य राखी आईपीओ खोल्ने ढोका  खुलेको छ ।  यस मुद्दामा अन्तरिम आदेश दिन न्यायाधीशद्वय जनक पाण्डे र पुरुषोत्तम प्रसाद ढकालको संयुक्त इजलासले अस्विकार गरेकाे हाे।

यसअघि मंसिर २२ गते उच्च अदालतमा हरिबहादुर केसीले हिमालयन रि-इन्स्योरेन्सलाई प्रिमियम मूल्यमा आईपीओ जारी गर्न रोक्नुपर्ने भन्दै रिट दर्ता गरेका थिए । त्यस रिटमा नेपाल बीमा प्राधिकरण, नेपाल धितोपत्र बोर्ड र हिमालय रि-इन्स्योरेन्सलाई विपक्षी बनाइएको थियो ।

कम्पनीले  १०० रूपैयाँमा १०६ रुपैयाँ प्रिमियम थप गर्दै प्रतिकित्ता २०६ रुपैयाँका दरले आईपीओ जारी गर्न लागेकाे छ । कम्पनीको आईपीओ यसै बुधबारदेखि जारी गर्ने तयारी गरिएको छ ।