काठमाडौँमा एशियन बैंकर्स संघ (एबिए)को कन्फरेन्स सुरु

काठमाडौँ । आज बिहीबारदेखि काठमाडौँमा एशियन बैंकर्स संघ (एबिए)को कन्फरेन्स सुरु भएको छ । नेपाल बैंकर्स संघका अनुसार एबिएको ३९ औ जनरल मिटिङ र कन्फरेन्स हुन लागेको हो।

२ दिनसम्म चल्ने यस कन्फरेन्समा सदस्य देशका अर्थमन्त्री, सदस्य देशका केन्द्रीय बैंकका गभर्नर, सदस्य देशका बैंकका अध्यक्ष र प्रमुख कार्यकारी अधिकृत, विभिन्न अन्तराष्ट्रिय विज्ञहरु सहभागी हुने छन् । कोरोनाको कारण यस अघि लगातार २ पटक एबिएको कन्फरेन्स भर्चुअल माध्यमबाट भएको थियो । सन् २०१९ को कन्फरेन्स भने फिलिपिन्सको मनिलामा भएको थियो । त्यस अघिका दुई कन्फरेन्स क्रमश माल्दिभ्स र भारतमा भएको थियो।

नेपाल बैंकर्स संघले पहिलो पटक एबिएको कन्फरेन्स आयोजना गर्न लागेको हो। एबिएमा एशियाली देशका बैंकहरुको संगठन सदस्य हुने गर्छन्। एबिएको स्थापना सन् १९८१ मा भएको हो । यसको प्रधान कार्यालय ताइवानमा रहेको छ।

नेपाल बैंकर्स संघका अनुसार पहिलो दिनको कार्यक्रम बिहान ९ बजेबाट सुरु हुने छ। सुरुवाति कार्यक्रममा बैंकर्स संघको अध्यक्ष सुनिल केसीको स्वागत मन्तब्य, नेपाल राष्ट्र बैंकका गभर्नर महाप्रसाद अधिकारीको विशेष मन्तब्य, अर्थमन्त्री डा, प्रकाशशरण महतको कि नोट एड्रेस, र एशियन बैंकर्स संघका अध्यक्षको क्लोजिंग रिमार्क्स रहने छ ।

त्यसपछिको पहिले प्लेनरी सेसनमा नेपालको आर्थिक वृद्धिबारे बहस हुने छ । त्यस सेसनको अध्यक्षता गभर्नर अधिकारीले गर्ने छन् भने वक्ताको रुपमा विश्व बैंक अन्तर्गतको आईएफसीका नेपाल प्रमुख, बेलायती दुतावासका डेपुटी हेड अफ मिसन, धितोपत्र बोर्डका अध्यक्ष र नेपाल बैंकर्स संघका अध्यक्ष रहने छन् । सुजीव शाक्य यसको संचालन गर्ने छन् ।