काठमाडौं। दसैंका लागि बिक्री हुने खसीबोका काठमाडौंमा अस्वस्थकर किनबेच राेकिने भएको छ। महानगरपालिकाले आगामी मंगलबारदेखि दसैंलक्षित खसीबोका लगायत चौपायाको स्वास्थ्य परीक्षण सुरु गर्ने भएको छ।
कामपाले विगतका वर्षमा भन्दा यसपटक केही दिनअघिबाट चौपायाको परीक्षण सुरु गर्न लागेका हो। अघिल्ला वर्षमा घटस्थापनादेखि नवमीसम्म मात्र बजार अनुगमन गर्दै आएको थियो।
कलंकी, टुकुचा, बालाजु, कोटेश्वर र खाद्य संस्थानको बिक्री केन्द्रमा चौपायाको स्वास्थ्य परीक्षण गर्ने तयारी गरिएको छ। अनुगमन समितिको संयोजकसमेत रहेकी उपप्रमुख सुनिता डंगोलको संयोजकत्वमा कामपा कृृषि तथा पशुपन्छी विभाग, पशु चिकित्सक, कामपा प्रहरी र वडाको समन्वयमा खसीबोका लगायत चौपायाको परीक्षण गर्ने कामपा कृषि विभाग प्रमुख डा अवधेश झाले जानकारी दिए।
उनका अनुसार बिक्री केन्द्रमा नै गरिने अनुगमनका क्रममा स्वस्थ खसीबोकाको सिङमा हरियो र अस्वस्थको सिङमा रातो रङ लगाइने तयारी छ। परीक्षणपछि उपभोक्तालाई खरिद गर्न सहज हुने भन्दै उनले सिङमा हरियो लगाइएको खसीबोका मात्र खरिद गर्न आग्रह गरे।
उक्त समयमा कामपाले चौपाया बिक्री स्थान, मासु पसल र वधशाला लगायतका स्थानमा समेत अनुगमन गर्ने जनाएको छ। प्रत्येक स्थानमा पशु चिकित्सक, सहायकसहित अन्य पाँच जना टोलीले परीक्षण गर्ने तयारी छ।
दसैँका लागि मात्र कामपाले जिल्ला पशुसेवा कार्यालय वा भेटनरी जनस्वाथ्य कार्यालय वा स्वतन्त्र भेटनरी चिकित्सकको सहयोगमा चौपायाको स्वाथ्य र मासु निरीक्षण गर्ने गरेको छ।
चालु आर्थिक वर्षमा कामपाले स्वास्थ्य क्षेत्रका लागि रु ९२ करोड ६६ लाख ४४ हजार रकम विनियोजन गरेको छ। जसमा व्यक्तिगत तथा संस्थागत भान्साघर स्वस्थकर बनाइराख्नका लागि तीन करोड ५० लाख रुपैयाँ छ।
बजारलाई थप व्यवस्थित गर्न कामपाले गत साउनभित्र अनुगमनका सूचक तयार गरी भदौ १ देखि नियमित अनुगमन गर्दै आएको छ। चाडबाड आउनै लाग्दा मात्रै अनुगमनको काम गर्ने गरेको थियो।
मौसमीरूपमा गरिएको अनुगमनको कामले प्रभावकारी नभएको र त्यसले उपभोक्तालाई राहत नमिलेको भन्दै अहिले कामपाले चाडबाड सुरु हुनु केही महिनाअघिदेखि नै अनुगमनको कामलाई निरन्तरता दिइरहेको छ ।
बजेट तथा कार्यक्रम तर्जुमा समितिले पेस गरेर नगरसभाबाट पारित भएका कार्यक्रमको अनुगमन उपप्रमुखको संयोजकत्वमा रहेको अनुगमन तथा सुपरीवेक्षण समितिले गर्नेछ। रासस
प्रतिक्रिया
कुनै पनि प्रतिक्रिया पाईएन !